انا حربي عندي 34 سنة ..عازب مليش حد ابويا وامي ماتوا من زمان وعمي اللي رباني بس مراته كانت قاسية عليا من صغري انا وأختي كان لينا ورث عند خالي فؤاد ..بس للأسف كل حقي وحق أختي وقال أن امي كتبت له حقها في ورث ابوها بيع وشرا وصرفته على علاج ابويا العيان
انا طبعا مصدقتش الكلام دا ..لاني فاكر كويس اوي قبل ما تموت امي بشهرين خدتني معاها عند أخوها فؤاد وطلبت يديها ورثتها ..وقالت له انها هتموت والعيال ملهمش حد في الدنيا غيرك انت وعمهم وعمهم ظروفه على أده ..وليهم حق عندك ورثي من ابويا
زعق فيها وقالها انتي ملكيش حاجه عندي وبعدها طردنا واللي وجعني اكتر ان كل دا حصل قدام ياسمين بنته ..واللي كنت بحبها اوي وهي كمان كانت بتتبادلني نفس الشعور عكس أخوها كريم اللي كان مش بيطيق يشوفني
حسيت اني أنكسرت قدامها وكنت هموت وأنا بشوف نظرة الذل في عيون أمي وهي مريضة وجوزها ميت ومش عارفه تجيب حقها وحق ولادها من اخوها
ماتت امي بحصرتها وطلعت أنا من الاعدادي عشان اشتغل واساعد مع عمي في المصاريف فضلت اشتغل وقدرت أجهز اختي ..وجوزتها في البلد عندنا ..ونزلت على مصر من عشر سنين
العيشة هنا صعبة أوي ..عكس عيشة الأرياف اشتغلت في كذا شغلانه ..وفضلت اتنقل من هنا لهنا والدنيا ملخبطة معايا ع الاخر
من كام سنه كنت اشتغلت في مصنع نسيج واتعرفت على حسان ..واد مجدع وصاحب صاحبه ظروفه نفس ظروفي عايش لوحده في أوضة ع السطوح
ليا فترة الامور معايا ملخبطه ..سبت التاكسي اللي كنت راكب عليه وعاطل والحالة معايا من تحت الصفر
عندي صديق ليا في قريتنا اسمه هاني المنشاوي كلمني من شوية وقالي خالك فؤاد تعبان جدا وفي المستشفى
فكرت أني لو روحتله واتكلمت معاه من تاني وطلبت منه ورثتي ..يمكن قلبه يحن ويرجع لي حقي ..عشان يقابل رب كريم وهو مرتاح ومش واكل حق ولاد أخته
كلمت حسان وقولتله بكره الصبح رايح البلد ازور خالي وهو مريض واطلب منه حقي لاخر مرة ..يمكن يوافق ويرجعهولي ..وطلبت منه 500 جنيه سلف لحد ما الدنيا تمشي
قالي انا كمان عايز ازور بلدكم..اهو اكون معاك وكمان أغير جو وأرتاح من ضغط الشغل
نمت ليلتها عنده وتاني يوم كان حسان راح شغله وقدم على أجازة 3 أيام وبضهر رجع واخدنا ميكروباص وسافرنا على الغربية
وصلنا القرية بعد العصر ..روحت على بيت هاني صاحبي أسلم عليه رحب بينا جدا وقالي يااه أكتر من عشر سنين ياراجل مشوفناش بعض فيهم
أعمل ايه بقى ..اهو أكل العيش ..كان نفسي أجي البلد ..بس بعد ما أختي اتجوزت وسافرت ع الخليج مع جوزها وأنا حسيت اني رجلي اتقطعت ومبقليش حد
عيب تقول كدا ..اومال انا روحت فين بيتك ومطرحك .. كلك واجب والله يا هاني
طيب انا هسيب حسان هنا عندك واروح على بيت خالي .. معلش بقى يا حسان
ولا يهمك يا صاحبي …ربنا معاك
روحت على بيت خالي وانا بقدم رجل وبأخر التانية وخايف من مواجهته ..رغم اني صاحب الحق بس لما وصلت الفيلا وقبل ما ادخل لقيت الحركة غير عادية والكل زعلان
للأسف خالي توفي !!
